Mae amser yn bopeth i rai, gyda phob awr, munud ac eiliad yn cyfri o ddifri. I eraill wedyn, nid yw’n golygu dim. Ond daw eiliadau yn ein bywydau ni pan nad oes dewis gennym ond sylwi ar bresenoldeb a phwysigrwydd amser. Ac eiliad o sylweddoliad o’r math hwnnw sydd yn y soned hon gan Gwion Hallam, eiliad a barodd iddo gofio am ffrind fu farw mewn damwain beic-modur pan oedd y ddau ohonyn nhw yn yr ysgol.